افغان مېرمنې د تولید په برخه کې د عالي وړتیاو څخه برخمنې دي.
د هېواد د اقتصاد وزیرې ډاکټر کریمه حامد فاریابي په هغه غونډه کې، چې د مارچ په اتمه د ښځو د نړیوالې ورځې په پار " په اقتصادي چارو کې د ښځو د ګډون" ترسرلیک لاندې جوړه شوې وه؛ په هېواد کې د ښځو د ستونزو په حل او په سوداګریزو چارو باندې خبرې وکړې او وویل: دم ګړی ۵۴ زره مېرمنې په وړو خصوصي تشبثاتو کې بغیر د جواز د نه درلودو په صورت کې فعالیت کوي، او باید د دوی چارې قانوني شي.
هغې په خپلو خبرو کې زیاته کړه، چې افغان مېرمنې د تولید په برخه کې د ښو وړتیاوو څخه برخمنې دې؛ مګر مالي ملاټر نه لري، چې خپل تولیدات وپلوري.
د اقتصاد وزیرې د ښځینه و سوداګرو د عمده ستونزو د لنډې ارزونې سره وویل: دوی پوره پانګوونې ته لاس رسی نه لري، د ځای نه شتون او مارکیټ نه درلودل د مېرمنو له عمدو ستونزو څخه دي. او همدا راز هغوی د نړیوالو او ملي بنسټونو څخه وغوښتل، چې دوی ته دوامداره او بنیادي برنامې جوړې کړي.
دا په داسې حال کې ده، چې اوسمهال ۲۷۰۰ مېرمنې د هېواد په کچه په قانوني ډول کار کوي او پاتې مېرمنې د بېلابېلو دلایلو له مخې، لکه : د جواز په پروسه کې ځند او د فیس لوړوالی له امله یې تر اوسه جوازونه نه دي اخیستي.
