د افغانستان د اقتصاد وزیر په عامه او خصوصي خبرې اترې کې؛ چې د خصوصي سکتور د پراختیا اجرایوي کمیټې (PriSEC)، اقتصاد، صنعت او تجارت وزارتونو او نړیوال بانک (IFC) له خوا په کابل کې جوړ شوی و، وینا وکړه.
دا ناسته د هغو غونډو په لړۍ کې ترسره شوه؛ چې په مزارشریف، هرات، کندهار او جلال آباد ښارونو کې له خصوصي سکتور سره شوي وې، چې بنسټیزه موخه یې د لا ډېرو اسانیتاوو او اقتصادي ودې برابرولو لپاره له خصوصي سکتور سره د فعال خبرو اترو دوام دی.
ښاغلي وزیر له شته خنډونو سره د مبارزې لپاره او سترو ملي موخو لکه ( د دندو رامنځته کول، د بې وزلۍ کمول او اقتصادي ودې) ته د رسېدلو لپاره د دې دوو سکتورونو د همکارۍ دوام بنسټیزه اړتیا وبلله.
هغه زیاته کړه؛ د داسو غونډو جوړول او پر یو مېز د برابرو دریځونو څخه خبرې کول، د ستونزو د سپړنې او مشخصې او عملي حل لارې لټول، د ګډو فعالیتونو د پراختیا او پورته موخو ته په رسېدلو کې اغېزناک رول لوبولی شي.
د اقتصاد وزیر د ۵۰ په ۵ کې (۵۰ موخې په ۵ میاشتو کې) پروګرام د درېیم پړاو د تطبیق په اړه هم خبرې وکړې او د تېرو دوو پړاوونو د بریالي تطبیق لپاره د عامه او خصوصي سکتورونو د ګډو هلو ځلو ستاینه یې وکړه. د اقتصاد وزیر ژمنه وکړه؛ چې د اقتصاد وزارت به د کار موندنې په برخه کې د خصوصي سکتور د ودې لپاره د حکومت ترڅنګ، له هیڅ ډول هڅې څخه ډډه ونکړي.
