د کارموندنې پروژې د رهبرۍ کمېټې غونډه دایره شوه

د ۱۳۹۹ لمریز کال د کب د میاشتې یوویشتمه نېټه، پینځه‌نۍ

نن له غرمې مخکې، د هېواد د اقتصاد وزیرې ډاکتر کریمه حامد فاریابي په مشرۍ د وزارت د معینانو او د پلي کوونکو ادارو د رییسانو (د اقتصاد وزارت، د بهرنیو چارو وزارت، د سیمه‌ییزو ارګانونو د خپلواکې ادارې او د کابل ښاروالۍ) ترمنځ د پلي کوونکو ادارو د مشکلاتو د رفع کولو او د دوی تر منځ د لا زیاتې همغږۍ په موخه د کارموندنې پروژې د رهبرۍ غونډه (Steering Committee) په اقتصاد وزارت کې دایره شوه.

غونډه د ډاکتر کریمه حامد فاریابي په ویناوو پیل او له هغه وروسته، د کارموندنې پروژې اجراييوي رییس، مطیع الله جاهد د غونډې ګډونوالو ته یاده پروژه ور وپېژندله او د پروژې د فعالیتونو، پرمختګونو، ننګونو او د دغې پروژې د لاسته راوړنو په اړه يې معلومات ورکړل.

همداراز د اقتصاد وزیرې هم په دې وزارت او پلي کوونکو ادارو کې پر موجودو ظرفیتونو باندې په ټینګار او د نړیوالو معیارونو او د روڼتیا اصل، موثریت، پرمختګونو او لاسته راوړنو په پام کې نیولو سره دغه پروژه د تطبیق پر مهال له موجودو ننګونو سره سره هم مثبته وارزوله.

وروسته د تطبیق کوونکو ادارو استازو په خپل وار سره د دغې پروژې د اهمیت په اړه خبرې وکړې او د یادې پروژې پر لاسته راوړنو، ننګونو او راتلونکو پلانونو یې بحث وکړ او د دغې پروژې د موثر او پر وخت تطبیق په پار یې ډاډ ورکړ.

غونډه د تطبیق کوونکو ادارو لخوا د پرېکړو په راټولو پای ته ورسېده.