په پروان کې د غیر دولتي موسساتو سره د همغږۍ غونډه جوړه شوه
اقتصاد وزارت _ افغانستان: په پروان کې د غیر دولتي موسساتو سره د همغږۍ میاشتنۍ غونډه د ولایت د مقام مرستیالانو، د سکتوري ریاستونو رییسانو او د غیر دولتي موسسو د استازو په ګډون جوړه شوه.
د پروان والي ډګرجنرال فضل الدین عیار په دې غونډه کې د غیر دولتي موسساتو څخه وغوښتل، چې خپل فعالیتونه دې د اقتصاد ریاست سره په همغږې وکړي.
د پروان والي د غیر دولتي موسسو د فعالیتونو او د پروژو د تطبیق په برخه کې په ځانګړي ډول د روغتیا او د سیلاب ځپلو سره د مرستې پر مهال د مننې ترڅنګ خبرداری ورکړ، هغه ادارې، چې د اقتصاد ریاست له همغږۍ پرته فعالیت کوي ، که دوی د همغږۍ پرته فعالیت ته دوام ورکړي قانوني چلند به ورسره وشي.
د پروان ولایت د اقتصاد رییس مسیح الله هاروني په دغه ولایت کې د غیر دولتي موسسو تر پلان لاندې او د پلې شویو پروژو په اړه راپور وړاندې کړ.
اوس مهال ۳۶ غیر دولتي موسسې په پروان ولایت کې فعالیت کوي او د روان کال تر پایه به په دغه ولایت کې ۶۴ پروژې پلي کړي.
