په کندهار د پنځمې ناحیې د حاجي عزیز سړک ګټې اخیستنې ته وسپارل شو
۱۳۹۹لمریز کال/ کب/۱۴
د کندهار ولایت په پنځمه ناحیه کې د حاجي عزیز سړک، چې کار یې په دې وروستیو کې بشپړ شوی و د اقتصاد وزیري ډاکټر کریمه حامد فاریابي، د کندهار ولایت والي الحاج روح الله خانزاده، د ولایتي شورا مرستیال حاجي عبدالقیوم، د کندهار ښاروال انجینیر محمد رفیع حیات له لوري افتتاح او ګټي اخیستني ته وسپارل شو.
په پیل کې د کندهار والي له ښاریانو څخه وغوښتل، چې د سړکونو په ساتنه او پالنه کي زیاته پاملرنه وکړئ او د شته پانګې د ساتنې لپاره خپله بنسټیزه ونډه ترسره کړي.
وروسته د اقتصاد وزیري ډاکټر کریمه حامد فاریابي وویل: عمراني او بنسټیز فعالیتونه، نه یوازې د ټولنې او اقتصادي پراختیا لامل کېږي، بلکه د ټولنې د سولې او سوکالۍ لپاره مهمه ونډه اخیسته ثابتوي. د سړک جوړښت د ژوند آسانتیاو د برابرولو ترڅنګ د ټولنې د پراختیا ټولو برخو ته اغیز ښندي او د سولې بنسټونه پیاوړي کوي. د امنیت په ساتلو سره د خلک ژوند ته بدلون راولي.
همدارنګه د کندهار ښاروال انجنیر محمد رفیع حیات او د اقتصاد وزارت د کارموندنې برنامې رییس مطیع الله جاهد په خپلو خبرو کې وویلې: یاد سړک، چي ۹۲۴ متره اوږدوالی او ۱۲ متره بر لري د ۲۹۵۷۵۸۳۰ افغانیو په لګښت د نړیوال بانک له لوري تمویل شوی او د کندهار د ښاروالۍ په مدیریت سره د افغان کرستل شرکت لخوا د ۷ میاشتو په لړ کې بشپړې شوی دی.
یاده پروژه د کارموندنې EZ-KAR برنامې لومړنۍ پروژه وو، چې د اقتصاد وزارت تر مشرتابه او د بهرنیو چارو وزارت، د کډوالو او راستنیدونکو چارو وزارت ، د سیمه اییزو ارګانونو خپلواکې ادارې او د کابل ښاروالۍ په همغږۍ تر سره شوې، چې د سیمې خلکو ته د ژوندانه د آسانتیاو د برابرولو ترڅنګ ۴۲۰۰ بې کاره ځوانانو ته یې کاري فرصت هم برابر کړی و.
