په ملګرو ملتونو کې د افغانستان دایمي استازي او سفیر سره د اقتصاد وزیرې د پېژندنې او مشورې ناسته
اقتصاد وزارت ـ افغانستان: د اقتصاد وزیرې ډاکټر کریمه حامد فاریابي په ملګرو ملتونو کې د افغانستان دایمي استازي او سفیر غلام محمد اسحاقزي سره د پېژندنې او مشورې د ناستې لپاره وکتل.
ډاکټر فاریابي په دې غونډه کې د اقتصاد وزارت د وروستیو لاسته راوړنو په اړه معلومات وړاندې کړل او په ملګرو ملتونو کې د افغانستان د دایمي استازي په توګه د افغانستان د حکومت د اقتصادي پلانونو د ملاتړ لپاره د یاد سازمان د پاملرنې د راجلبولو غوښتنه وکړه.
د اقتصاد وزارت د مسلکي معینیت سرپرست محمد نبي سروش د تلپاتي پراختیایي موخو ته د رسیدو لپاره د همغږۍ په رامنځته کولو ټینګار وکړ او سالم چاپیریال یې د SDGs له مهمو موخو څخه وګڼلو. افغانستان د کاونډیو هیوادونو په تاثر چاپیریال ته زیان رسوونکي توکي تولیدوي. نوموړي په دې برخه کې د ملګرو ملتونو د غړیو هیوادونو د پاملرنې غوښتنه وکړه.
په ملګرو ملتونو کې د افغانستان سفیر او دایمي استازي غلام محمد اسحاقزي د اقتصاد وزارت پروګرامونه تایید کړل او څرګنده یې کړه، چې په هیواد کې د جګړې او تاوتریخوالي داستان باید د سولې او ثبات په داستان بدل شي. په ملګرو ملتونو کې د افغانستان دایمي استازی ژمنه کوي، چې په دیپلوماتیکو هڅو سره به د ملګرو ملتونو د غړو هیوادونو سره به د افغانستان اسلامي حمهوریت اطلاعات او احصایوي ارقام شریک کړي، ؛ تر څو په افغانستان کې د اقتصادي او پراختیایي پروګرامونه او طرحې پلي کړي.
