په افغانستان کې د پایداره پراختیايي اهدافو د تحقق په لور یو بل ګام
۱۳۹۹لمریز کال/د کب/۵
نن له غرمې مخکې په کابل کې د نړیوال سازمان پراختیایي برنامه، د افغانستان حکومت لپاره د پایداره پراختیايي اهدافو او هېواد ته د پراختیايي پروژو د تطبیق لپاره یو اقتصادي موډل معرفي کړ, چې کولای شي په هېواد کې د پایداره پراختیايي اهدافو د بهتره پلي کېدلو لپاره اغېزمنه وي.
د دې موډل د پرانیستې په غونډه کې چې په کابل سرینا کې جوړه شوې وه، د اقتصاد وزیرې ډاکتر کریمه حامد فاریابي، په افغانستان کې د نړیوال سازمان د پراختیایي برنامې رییس ښاغلي عبد الله الدرداري، د مالیې وزارت د پالیسي مرستیال ښاغلي محمد نذیر کبیري او د معلوماتو او احصاییې ملي ادارې د ملي محاسباتو رییس ښاغلي غلام حضرت امیني خبرې وکړې.
د اقتصاد وزیرې، د پایداره پراختیايي اهدافو د تطبیق او هم د دولت د ټولو برنامو لپاره د سمې او دقیقې احصاییې او ارقامو په اړتیاوو باندې ټینګار وکړ او د دې موډل جوړونه او وده یې د پراختیایي پروژو د تطبیق په پروسه کې او د پایداره پراختیايي اهدافو د تحقق لپاره د یوې اقتصادي لاسته راوړنې په توګه وګڼله.
نوموړي زیاته کړه, چې:"دغه موډل کولای شي د پالیسیو په ترتیب، تصمیم نیولو او د حالاتو د څارنې په برخه کې د اقتصادي سکتور د اړوندو ادارو د رهبرۍ او د حکومت مشرتابه ته لارښوونه وکړي او په اقتصادي وده کې د پانګونې اغېزې، د بېوزلۍ د کمولو، د دندو د رامنځه کولو... او نورو مواردو څارنه او محاسبه وکړي.
