د هېواد د اقتصاد وزیر ښاغلي ډاکټر مصطفی مستور نن د ماتېدونکي وضعیت هېوادونو لپاره د نړیوال بانک له ځانګړي استازي ښاغلي البرت جرارد کويندرز سره وکتل.
په دغه لیدنه کې پر اوسني سیاسي او اقتصادي وضعیت او پر ثبات د هغه پر جانبي اغېزو بحث وشو. د اقتصاد وزیر د حکومت یو مهم لومړیتوب د اوسني سیاسي اقتصادي وضعیت سالم مدیریت وباله چې هسې نه اوسنی حالت د شخړې سرچینه شي. همدارنګه په نوو برنامو کې د نړیوال بانک د رول پر پیاوړتیا، نننیو اړتیاوو او تر سولې وروسته د اقتصادي پراختیا شرایطو ته په کتو د افغانستان د بیارغونې د وجهي صندوق پر راتلونکو پلانوو، ځوان نسل ته د کارموندنې او په کلیو کې د ښځو د اقتصادي فعالیتونو پر پراختیا بحث وشو. ۶ قوس ۱۳۹۸
