د ارزونې عالي کمیسیون له لوري د ۴۴ کورنیو او بهرنیو غیر دولتي موسسو سندونه تایید شول

افغانستان- اقتصاد وزارت: د ارزونې عالي کمیسیون د ۴۴ غیر دولتي کورنیو او بهرنیو موسسو (۴۲ غیر دولتي کورنۍ موسسې او ۲ بهرنيو موسسو) سندونه تایید کړل.

نن په اقتصاد وزارت کې یاد کمیسیون داقتصاد وزیرې ډاکټر کریمه حامد فاریابي په مشرۍ او د غیر دولتي موسسو د انسجام د چارو رییس او استازو، د اړوندو ادارو استازو او د غیر دولتي موسسو مسولینو په ګډون غونډه جوړه شوه.

په پام کې ده، چې په دې نږدې ورځو کې هغو موسسو ته د فعالیت جوازونه ورکړل شي، چې د ارزونې د عالي کمیسیون له لورې یې اسنادونه ارزول شوي او تایید شوي دي.

په دې غونډه کې د یوې بهرنۍ غیر دولتي موسسې سندونه د لازمو اسنادو د نه تکمیل له امله د یاد کمیسیون بلې غونډې ته وځنډول شوه او همداراز د ۷ غیر دولتي موسسو د بیا فعالیدو په اړه تصمیم ونیول شو.

ډاکټر کریمه حامد فاریابي په دې غونډه کې د موسسو د ثبت او راجسټر په برخه کې په روڼتیا او حساب ورکوونې باندې تاکید وکړ. او هغه موسسې، چې د فعالیت جوازونه اخلی، باید د غیردولتي موسسو د انسجام د چارو ریاست ته د خپلو کړنو په اړه راپورونه وړاندې کړي.

دغه موسسې د روغتیا، ټولنیزو خدماتو، ښوونې او روزنې او د کرنې په سکتورونو کې فعالیتونه کوي.