د اقتصاد وزارت ځانګری بیرغ معرفي شو
د ۱۳۹۹ لمریز کال د سلواغې د میاشتې دیارلسمه نېټه, کابل
د اقتصاد وزارت ځانګری بیرغ چې په دې وروستیو کې د نورو اداراتو تر منځ د دغه وزارت د اصلي دريځ د بنسټیز د تشخیص په موخه چمتو او برابر شو دی، د اقتصاد وزیرې ډاکتر کریمه حامد فاریابي لخوا معرفي شو.
په پیل کې د اقتصاد وزیرې د وزارت د بیرغ پر اړتیاوو او ځانګړنو خبرې وکړې او هغه یې په غونډو او محافلو کې د وزارت د تشخیص نښه وګڼله.
ډاکتر فاریابي وویل: د وزارت په وياړلي بیرغ کې د افغانستان د ځانګړي تولید په توګه د زعفرانو د رنګ منعکس کېدل پر وطني محصولاتو باندې له پانګونې څخه زموږ ملاتړ او د هېواد د تولیداتو لپاره بازار رامنځته کول دي.
هغې همداراز زیاته کړه: د اقتصاد وزارت د یوه دولتي ارګان په توګه د ۱۳۹۵ لمریز کال د تلې د میاشتې په ۲۷ نېټه په رسمي جریده کې د "بیرغ کارونې، ملي نښې او ملي سرود د ډول" د خپاره شوي قانون د ۲۵ مادې د صراحت له مخې د اقتصاد وزارت کولای شي چې خپله ځانګړې نښه او بیرغ ولري, چې د قانون د اصولو مطابق کار ترې واخلي.
