د اقتصاد وزیره: په پوله باندې سوداګري او د هغې پراختیا د افغانستان اسلامي جمهوریت له بنسټیزو موخو څخه ګڼل کیږي

د افغانستان او تاجکستان ترمنځ د پولې کمیسیون دوهمه نوبتي غونډه د اقتصاد وزیرې ډاکټر کریمه حامد فاریابي، د آغا خان د پراختیایي شبکې استازي شهزراده هېرجي، د تخار ولایت والي عبدالله قرلق، د آغا خان د بنسټ رییس ډاکټر نجم الدین، د تاجکستان هېواد استازي او د تراڼسپورټ وزیر، په افغانستان کې د اروپایي اتحادیې استازي، په تاجکستان کې د اروپایي اتحادیې استازيو په ګډون په انلاین ډول دافغانستان او تاجکستان ترمنځ د اقتصادي او پراختیایي فرصتونو د تقویت لپاره، د پولې دواړو لوریو کورنیو ته د کاري فرصتونو د مهیا او د فقر د له منځه وړلو په موخه جوړه شوه.

ډاکټر کریمه حامد فاریابي د آغا خان بنسټ، د اروپایي اتحادیې او د آلمان پراختیایي بانک د دوامدارو او اغیزمنو مرستو څخه مننه وکړه او د پولې ترمنځ سوداګري او د هغې وده یې د افغانستان د اسلامي جمهوريت د بنسټیزو موخو څخه وګڼله.

نوموړي زیاته کړه:" د پولې ترمنځ سوداګرۍ کې زمونږ اصلي موخه د کوچنیو او منځنیو سوداګریو د پراختیا لپاره د دواړو هېوادونو د تجربو شریکول دي، چې دا کار به دواړو هېوادونو کې بوختیاوې رامنځته کړي او بې وزلۍ به له منځه یوسي. او د ځان بسیاینې په لور به مو ګامونه اخیستي وي.

د غونډې ګډونوالو په دواړو پولو کې د اقتصادي او پراختیایي اغیزمنو فرصتونو د رامنځته کولو په اړه، د دواړو هېوادونو د کورني او بومي تولیداتو لپاره د مناسب بازار د رامنځته کول، د بې وزلۍ ورکول ، د پروژو د پلي کېدلو پروسې چټکتیا او د پولو دواړو لوریو ته د اوسیدونکو د غوښتنو د برابرولو په اړه خبرې وکړې.

په دې غونډه کې د SCORED بنسټیزې پروژې د اقتصادي کړنو د پرمختګ راپور، چې د اروپایي اتحادیې له لوري تمویلېږي وارزول شو.

دا په داسې حال کې ده، چې دوه کاله مخکې د افغانستان-تاجکستان د پولو ترمنځ د اقتصادي او پراختیایي همکاریو هوکړه لیک د اقتصاد وزارت او د آغا خان بنسټ ترمنځ لاسلیک شوی و.