د اقتصاد وزیرې ډاکتر کریمه حامد فاریابي د اقوامو په چارو کې د ولسمشر له سلاکار ښاغلي محمد اسحاق بهمن او د ترکمن قوم له یو شمېر مشرانو سره وکتل.

ښاغلي بهمن د افغانستان ټولنیز او اقتصادي وضعیت په تړاو د هېواد په اقتصادي وده کې د قومونو ونډه مهمه او د پام وړ وګڼله. او د یوې ټولنې سوکالي او اقتصادي وده، هغه وخت شونې ده چې د هم هغې ټولنې ټولو قومونو پکې برخه واخلي.

وروسته ډاکتر کریمه حامد فاریابي د ټولنې په مادي او معنوي جوړښت کې د ښاریانو د بې دریغو هڅو د یادولو تر څنګ، ټول يې د هېواد د مادي او معنوي ارزښتونو او ویاړونو ونډه لرونکي وګڼل. اغلې وزیرې د افغانستان د سولې او پراختیا ملي چوکاټ دویم سند په یادولو سره چې تر ۲۰۲۵ زېږدیز کاله پورې د افغانستان د پراختیا څرګندوی دی، د قومونو، اقلیتونو او د ښځو ونډه په دغه سند کې اړینه وبلله او دغو مواردو ته په پاملرنه په هېواد کې د دولت جوړونې، سولې او بازار جوړونې ته د رسېدو مخکنی شرط وګاڼه. نوموړې! په هېواد کې ټولو مېشتو وګړو ته بلنه ورکړه، چې د افغانستان د سولې او پراختیا ملي چوکاټ دویم سند یا 2 ANPDF تر شا خپل تاریخي رسالت ادا کړي، تر څو ټول له یو بل سره د جمهوري نظام په پیاوړتیا او د ټولنې د سوکالۍ او ځان بسیاینې ته په رسېدلو کې ونډه واخلي.