د ولایتي پراختیا کمیتې غونډه (PDC)
افغانستان- د اقتصاد وزارت:
د ولایتي پراختیا کمېتې غونډه (PDC) د بادغیس ولایت والي حسام الدین شمس په مشرۍ او د ولایت د اقتصاد رییس محمد ادریس حسان او د دولتي اداراتو رییسانو په ګډون د ولایت د مقام په سالون کې ترسره شوه.
د غونډې په پرانیسته کې د بادغیس ولایت والي، د پراختیایي کمېټې د ارزښت او د پراختیایي پروژو پورې اړونده مواردو باندې خبرې وکړې او د یادو پروژو پر اړینتوبونو یې ټینګار وکړ.
وروسته د دې ولایت د اقتصاد رییس د سکتوري ادارتو لخوا هغو وړاندیز شویو پروژو په اړه چې د سکتورونو د فرعي کمېټو، تخنیکي کمېټې او د عامه مالي مدیریت د کمېټې لخوا چارې یې طی مراحل او بیرته اقتصاد ریاست ته راستانې شوې وې، په لنډه توګه معلومات وړاندې کړه او پای کې په ډېری رایو سره د "(۱۴۰۱ )لمریز کال د ولایتي اقتصادي- ټولنیز پلان" ته د (۹۵۶،۷۰۱،۳۰۰) افغانیو په ارزښت( ۴۸) پروژې تصویب شوې.
سربېره پر دې، د اقتصاد رییس د (۱۴۰۰) مالي کال کې د ولایت د منظور شوي پراختیایي پروژو په اړه چې (PMRS)سیستم کې شامل شوې دي، د دې سیستم د چارچلند او موثریت په اړه معلومات ورکړل او زیاته یې کړه، چې په (۱۴۰۰) مالي کال کې د (۲،۸۶۲،۹۴۳،۳۰۷) مجموعي بیې په ارزښت (۴۷) پروژې سیستم کې ثبت شوې دي.
نوموړي له هغو ریاستونو، چې د ولایتي پروژو په ډلبندۍ کې ونډه لري غوښتنه وکړه چې خپلې منظور شوې پروژې یې د مرکزي اداراتو لخوا تعقیب کړي، څو چې د پروژو چارې یې په چټک پر مخ لاړ او پلي شي.
