د ولسي جرګې د اقتصاد ملي کمیسیون لخوا د اقتصاد وزیرې ته بلنه
افغانستان- د اقتصاد وزارت: د اقتصاد وزیرې ډاکټر کریمه حامد فاریابي د وزارت ځینو رییسانو سره د ولسي جرګې د اقتصاد ملي کمیسیون د بلنې په ترڅ کې د یاد کمیسیون په غونډه ګډون وکړ.
په دغه غونډه کې ډاکټر فاریابي د یاد کمیسیون غړو ته د ۱۴۰۰ مالي کال د اقتصاد وزارت د پلان په اړه معلومات وړاندې کړل او د اقتصاد وزارت او د ولسي جرګې د اقتصاد ملي کمیسیون ترمنځ له ښو اړیکو یې ستاینه وکړه.
ډاکټر فاریابي د اقتصاد وزارت او د ولسي جرګې د استازو ترمنځ په ځانګړي ډول د اقتصاد د ملي کمیسیون غړو ترمنځ نږدې همغږي، د خلکو د غوښتنو د پوره کولو او هم د اقتصادي ودې په پار د استازو د وړاندیزونه او لیدلورو شریکول مهمه وبلل.
د ولسي جرګې د اقتصاد د ملي کمیسیون رییس عبدالعزیز حکیمي هم په خپل وار سره، اقتصاد وزارت کې د ترسره شويو کړنو په ستاینې سره، د اجرایي او مقننې قواو د اقتصادي برخو ترمنځ د همکارۍ او همغږۍ پراخه کول، د ټولنې د اړینو غوښتنو په توګه ایاد کړل.
د ولسي جرګې د ملي اقتصاد رییس، د دواړو قواو (اجراییه او مقننه) د اقتصادي برخو ترمنځ ګډ زیار د هېواد د اقتصاد لپاره اړینه وبلل او د اقتصاد وزارت څخه یې غوښتنه وکړه، چې د غیر دولتي موسساتو د کړنو په برخه کې د شته ننګونې د حل لپاره لازمه همکاری وکړي.
