د زمري اوومه د ملي بیرغ ورځ ولمانځل شوه.
اقتصاد وزارت _افغانستان: د زمري اوومه د ملي بیرغ ورځ د اقتصاد وزیرې ډاکټر کریمه حامد فاریابي په حضور کې د اقتصاد وزارت معینانو، رییسانو، مشاورینو، او د اقتصاد وزارت د کارکوونکو په ګډون ولمانځل شوه.
د اقتصاد وزیرې ډاکټر کریمه حامد فاریابي د افغانستان د ملي بیرغ د ورځې په مناسبت په جوړه شوې غونډه کې وویل، چې د افغانستان ملي بیرغ ددې هیواد د اوسیدونکو، ملي هویت، عزت او د ویاړونو سمبول دی.
ډاکټر فاریابي څرګنده کړه، چې د جمهوریت تر چتر لاندې ملي یووالي یوه مانا لري او د جمهوریت ترچتر لاندې په دې وروستیو کالونو کې د هیواد په کچه د ابادۍ او پرمختیا کارونه تر سره شوي دي. افغانو میرمنو خپل اساسي حقوق تر لاسه کړي دي.
د ملي بیرغ د ورځې په مناسبت په جوړه شوې غونډه کې د اقتصاد وزیرې د امنیتي او دفاعي ځواکونو د مقاومت او همدارنګه د هیواد د هغو اوسیدونکو، چې د جګړې په کرښو کې د ملي ارزښتونو د دفاع لپاره مبارزه کوي مننه وکړه.
ډاکټر فاریابي ټینګار وکړ که اړتیا شوه افغانې میرمنې هم چمتو دي، چې د امنیتي او دفاعي ځواکونو تر څنګ ودریږي، د ځمکنۍ بشپړتیا، د جمهوري نظام او نورو ملي ارزښتونو څخه دفاع وکړي. یاد مراسم د اقتصاد وزیرې او ددې وزارت معینانو له لوري د وزارت په انګړ کې د ملي بیرغ په پورته کولو سره پای ته ورسیدل.
