د اقتصاد وزارت او د ولسمشرۍ چارو د ادارې ترمنځ ګډه ناسته ترسره شوه
۱۳۹۹/کب/۵
د ولسمشرۍ د عالي مقام د هدایاتو د تعقیب، د کابینې د مصوباتو د تطبیق او د ولسمشرۍ عالي شوراګانو، د جینوا کنفرانس د ژمنو د تطبیق او د اقتصاد وزارت او د ولسمشرۍ چارو د ادارې ترمنځ د لا همغږۍ په موخه ګډه ناسته د ولسمشرۍ چارو د ادارې عمومي رییس او د اقتصاد وزارت د مشرتابه پلاوي په ګډون په اقتصاد وزارت کې ترسره شوه.
د دې ناستې په پیل کې د اقتصاد وزیرې ډاکټر کریمه حامد فاریابي په مخکې پنځه میاشتو کې د اقتصاد وزارت د عمده کړنو په یادولو، د افغانستان اقتصادي او ټولنیزې پراختیا د لاسته راوړنې لپاره د بنسټیزو بدلونونو پر جدي اړتیاوو باندې ټینګار وکړ.
هغې د اقتصاد وزارت د ستراتیژیک پلان د پایښت لرونکې پراختیا لاسته راوړنې او په هېواد کې د اقتصادي ودې لپاره د مناسب فرصت په توګه یاد کړ او ویې ویل: موږ د کارونو د ترسره کولو لپاره لازم ظرفیتونه لرو او کولای شو د افغانستان د سولې او پراختیا د دویم ملي سند په چوکاټ کې او د نظام د مشرتابه په ملاټر سره د هېواد د اقتصادي ودې اصلي او ملموسو پایلو ته ورسېږو.
په پای کې ډاکتر فضل محمود فضلي د ولسمشرۍ چارو د ادارې عمومي رییس په اقتصاد وزارت کې د ترسره شوو کارنو لپاره مننه وکړه او د هېواد د اقتصادي پراختیا لپاره یې د اقتصاد وزارت ونډه بنسټیزه او اړینه وبلله.
نوموړي زیاته کړه چې د افغانستان اسلامي جمهوریت اصلي موخه د خدماتو وړاندې کول دي؛ که دغه خدمتونه اقتصادي وي او که ټولنیز, خو څه چې اړین دي متوازنه پراختیا ده او موږ د متوازن او تلپاتې پراختیا لپاره مناسب او عملي پلانونو او ستراتیژیو ته اړتیا لرو. موږ د وزارت له اقتصادي پلانونو او برنامو څخه ملاټر کوو او د چارو په دیجیټلي کېدو کې د اقتصاد وزارت فعالیتونه ستایو.
د ولسمشرۍ د چارو د ادارې عمومي رییس د اقتصاد وزارت او د چارو د ادارې ترمنځ د ګډو کمېټو د جوړولو یادونه وکړه او د کړنو او اجرآاتو د لا موثریت لپاره یې د همغږۍ زیاتوالی اړین وباله.
په دې غونډه کې د ملي تدارکاتو د ادارې رییس، د مالیې وزارت د پالیسي مرستیال، د ولسمشرۍ چارو د ادارې عمومي رییس مرستیال، د پانګونې واحد د آسانتیاوو رییس او د ولسمشرۍ د چارو د ادارې او د اقتصاد وزارت د بېلابېلو برخو مسوولینو ګډون کړی وو.
