د افغانستان د اسلامي جمهوریت د اقتصاد وزیر پرون مازدیګر د افغانستان او پاکستان د ځوانانو د ۲۰۲۰ په ګډ انجمن کې ګډون او وینا وکړه.
د اقتصاد وزیر په دغه ناسته کې چې د افغانستان او پاکستان د ځوانانو لخوا د ښه راتلونکي لپاره د بهرنیو اړیکو د پیاوړتیا په موخه جوړه شوې وه، وویل: په نړۍ کې راتلونکې سیاسي، اقتصادي او ټولنیزې اړیکې ځوانان د خپلو بالقوه وړتیاوو په وسیله ټاکي. نوموړي په دوو ګاونډیو هېوادونو کې د جګړې او سولې حاکم وضعیت ته په اشاره له ځوانانو څخه د راتلونکو رهبرانو په توګه وغوښتل چې له یو بل سره د سوله ییز ژوند او په سیمه کې له اوسنیو ستونزو څخه د تېرېدو لپاره یو موټي واوسي او د علم د زده کړې او تجربو شریکولو په وسیله روښانه راتلونکي ته د رسېدو لپاره مبارزه وکړي. د اقتصاد وزیر زیاته کړه، حکومتونه ځي او راځي؛ خو ملتونه کولای شي خپل راتلونکي ښه کړي. افغانستان او پاکستان د خپلو فرهنګي او تاریخي ورته والو تر څنګ خورا زیاته ځوانه انرژي لري او که دغه انرژي د جوړونې او همپالنې په برخه کې د ګډو ستونزو د له منځه وړلو لپاره بسیجه شي، له شک پرته وروستي نسلونه به روښانه راتلونکی ولري.
