د افغانستان د اسلامي جمهوریت د اقتصاد وزیر ډاکټر مصطفی مستور پرون د آسیایي پراختایي بانک له نوی مشر ښاغلې نریندرا سنګرو سره په خپل دفتر کې وکتل.
په سر کې ښاغلې مستور د هېواد د اوسني اقتصادي حالاتو په اړه خبرې وکړې او وویل: د اقتصاد وزارت د اقتصادي ودې ، د بی وزلۍ او بی روزګارۍ په کمولو او د اقتصادي سکتورونو تر منځ د همغږۍ په پیاوري کولو کار کوي.
هغه زیاته کړه چې د دوامداره ودې او د مطلوب اقتصادي وضعیت لاسته راوړل د دقیق او مستند احصاییو او پیاوړي پلان جوړونې ته اړتیا لري؛ او هم د دوامداره پرمختایي موخو په ارزښت او د هغې په پلي کیدو خبرې وکړې او په دې برخه کې د آسیایي بانک څخه د لا نور همکارۍ غوښتنه وکړه.
وروسته له هغې د افغانستان لپاره د آسیایي پراختیایي بانک رئیس د شته پلانونو،طرحو او پروژو په اړه معلومات ورکړل او زیاته یې کړه چې، د آسیایي پراختیایي بانک د پخوا په شان د افغانستان لپاره بنسټیزې برنامې او پروګرامونه په پام کې لري.
او همدا راز ښاغلې رئیس د اقتصاد وزارت سره د خپلې تخنیکی مرستې ژمنه وکړه او زیاته یې کړه چې په نږدې راتلونکې کې به له افغانستان څخه د دې بانک یو کاري اقتصادي ټیم لیدنه کوي چې نوموړي ټیم اقتصاد وزارت سره په تولید ولاړ اقتصادی پلانونه،تحلیلونه او په دې برخه کې د مطالعاتو په ترسره کولو کې همغږي او مرسته کوي.
