د اقتصاد وزارت د مشرتابه هئیت غونډه د یاد وزارت د سرپرستې وزیرې ډاکټرې کریمه حامد فاریابي په ریاست ترسره شوه
په پیل کې ، د اقتصاد سرپرستې وزیرې قطر ته د جلالتمآب محمد اشرف غني په مشرۍ د افغانستان اسلامي جمهوري دولت د لوړ پوړو پلاوو سفر په اړه د معلوماتو په ورکولو سره؛ د قطر هېواد د سوداګرۍ او اقتصاد او هم د قطر د اداري پراختیا ، کار او ټولنیزو چارو له وزیرانو سره د خپلې لیدنې له لاسته راوړنو څخه یادونه وکړه.
آغلې فاریابۍ په افغانستان کې د کرنې او طبیعي ګازو په برخه کې د قطر هېواد پانګونې او په دې هیواد کې د کارکولو لپاره د افغان کارګرانو منلو ته د چمتووالي څخه خبر وکړ او یادونه یې وکړه چې ډېر ژر به یو پلاوی ټاکل کېږي ترڅو د دواړو هیوادونو هوکړه لیکونه تعقیب او پلي کیدلو ته یې لاره هواره کړي.
په همدې توګه، د اقتصاد وزارت نوماندې د وزارت د کار او فعالیتونو په اړه خپلې موندنې او ارزونې هم د غونډې له غړو سره شریکې کړې او د وزارت کاري موخو ترلاسه کولو او د افغانستان اسلامي جمهوري دولت د اقتصادي پلانونو او برنامو د پلي کولو په برخه کې د همکارانو د پام غوښتنه وکړه.
بیا د اقتصاد وزارت مرستیالانو او د کاري څانګو رئیسانو خپل کاري راپورونه آغلې کریمي ته وړاندې کړل او د ننګونو او نیمګړتیاو د له منځه وړلو لپاره یې لازم اقدامات ونیول.